Kringvarpið sendir hvønn morgun søgur, reportasjur, ljóðmyndir og mangt annað til yngstu lurtararnar. Á odda fyri hesum standa Elin á Rógvi og Jonna Fritsdóttir Mortensen. 

Barnaútvarpið hevur av og á temavikur, har farið verður í dýpdina við ymiskum evnum, t.d. happing og forelskilsi. Harafturat hevur sendingin eisini fastar tættir t.d. Lova mær við, har vertirnir biðja børnini lova sær við at uppliva eitthvørt. M.a. hava vertirnir verið við børnum, sum hava fingið hol í oyruni, staðið á vatnskí, spælt Barbie o.s.fr.

Søgan
Útvarpið hevur altíð havt barnasendingar. Longu í tíðini hjá føroyska útvarpinum úr Keypmannahavn í fimmtiárunum varð dentur lagdur á eisini at røkka børnini á føroyskum máli, og hendan kós varð hildin, tá Útvarp Føroya fór undir sínar sendingar í 1957.

Vanliga vóru barnasendingarnar eina ferð um vikuna. Innihaldið í teimum vóru søgur, samrøður, brøv, sangur og leikur. Aðrar sendingar í útvarpinum hava verið komandi og farandi. Í barnasendingunum hevur ongantíð verið steðgur.

Við árunum hava barnasendingarnar verið mentar í innihaldi og vavi. Nú í nógv ár hevur útvarpið havt barnasendingar hvønn dag í árinum, og hetta verður eins og áður hildið at hava stóran týdning fyri eitt nú samleikakensluna hjá børnunum í Føroyum.

Slag av sending: Barnaútvarp

Málbólkur: Børn

Sendilongd: 15 minuttir hvønn gerandismorgun

Vertir: Elin á Rógvi og Jonna Fritsdóttir Mortensen

Redaktørar:
Elin á Rógvi, elinr@kringvarp.fo og
Jonna Fritsdóttir Mortensen, jonna@kringvarp.fo