Kringvarp RSS

Jákup á Borg aftur á landsliðnum

Wed, 22 Feb 2012 22:12:36 Z

Eftir at hava spælt 61 altjóða dystir fyri Føroyar, segði Jákup á Borg landsliðnum farvæl í 2010. Men nú hevur miðvallarin úr B36 aftur hug at spæla fyri landsliðið.

- Eg spældi alla kappingina í fjør, uttan at verða darvaður av skaðum. Í ár eru bara tríggir landsdystir á skránni, so vónandi kann eg vera við til tær uppgávurnar, sigur Jákup á Borg í stuttari viðmerking við heimasíðuna hjá FSF.

- Hugurin til landsliðið er veruliga komin aftur, so eg gleði meg nógv til venjingarleguna á La Manga í komandi viku, sigur Jákup á Borg.

Leygardagin fer føroyska A-landsliðið hjá monnum á venjingarlegu á La Manga í Spania. Umframt venjingar, eru eisini tveir dystir á skránni. Týsdagin verður spælt ímóti Real Murcia úr næstbestu deildini, og mikudagin í næstu viku skal føroyska landsliði royna seg ímóti La Union, sum spælir í triðbestu deildini í Spania.

Nú verða aftur milliónahandlar í fiskivinnuni

Wed, 22 Feb 2012 18:46:01 Z

Eyðstein Djurhuus, formaður í felagnum, sigur, at skipanin elvir til milliónahandlar, og tað er ikki sunt fyri fiskivinnuna.

Hoyr innslag í útvarpstíðindunum.

Veit ikki um meiriluti er fyri nýggjari fiskivinnulóg

Wed, 22 Feb 2012 18:34:02 Z

Landsstýrismaðurin í fiskivinnumálum vísir tó til samgonguskjalið, har flokkarnir hava avtalað ein leist við rullandi skipan, ið skal geva fiskivinnuni tryggar karmar at virka undir.

Hoyr innslag í útvarpstíðindunum.

Fit

Wed, 22 Feb 2012 16:49:58 Z

Kognitivi sálarfrøðingurin Kristian Eli Andersen tosar um strongd

Magnus Heinason kannar havið kring Føroyar

Wed, 22 Feb 2012 16:03:18 Z

Magnus Heinason hevur verið sín fyrsta túr í ár, eftir at hava ligið í umleið tríggjar mánaðar í vetur, meðan ymsar umvælingar eru gjørdar við skipið.

Fyrsti túrurin í ár var ein standardhydrografi-túrur á 89 støðir, har hiti, salt, súrevni, ljós, fluorisens og æti verða mátað niður ígjøgnum sjógvin.

Hesir túrar verða gjørdir fýra ferðir um árið fyri at fylgja við umstøðunum og broytingum í havinum kring Føroyar. Túrarnir eru eisini liður í altjóða granskingarætlan, sum Havstovan er partur av.

Hetta slagið av túrum hava verið gjørdir síðan 1988, tó við smærri broytingum. Í ár eru støðirnar lagdar tættari landi, samstundis sum nýggjar støðir eru lagdar vestur úr Mykinesi. Hetta er gjørt fyri at fáa meira vitan um broytingarnar á Landgrunninum.

Veðrið var ólagaligt á túrinum, men kortini vóru allar 89 støðirnar tiknar, skrivar Havstovan á heimasíðuni.

Skal sita í fýra vikur aftrat

Wed, 22 Feb 2012 15:49:31 Z

Maðurin, sum er skuldsettur fyri at hava beint fyri Dánjali Peturi Hansen fyrst í november í fjør, skal sita fýra vikur afturat í varðhaldi.

Tað avgjørdi rætturin í dag fyri afturlatnum hurðum.

Ákærin vildi hava varðhaldsfongslingina longda, millum annað tí at mentalkanningin av tí varðhaldsfongslaða enn ikki er liðug.

32 ára gamli maðurin, sum hevur verið varðhaldsfongslaður síðani 16. november í fjør, noktar seg sekan í manndrápi, uppysir verjin, Annfinn V. Hansen.

Næstseinastu ferð, rætturin skuldi taka støðu til at leingja varðhaldsfongslingina, kravdi verjin, at rættarfundurin varð hildin fyri opnum hurðum. Men rætturin eftirlíkaði ikki kravinum.

Grundgevingin hjá verjanum var, at tann varðhaldsfongslaði fekk ikki rættvísa viðgerð, tí løgreglan kom við so mongum einvísum upplýsingum til fjølmiðlarnar.

- Hetta hevur løgreglan ivaleyst tikið til eftirtektar, tí nú hoyrist ikki so nógv í fjølmiðlunum, sigur Annfinn V. Hansen, sum tí ikki bað um at hava rættarfundin vera fyri opnum hurðum hesaferð.

Loyva aftur fosfat í saltfiski

Wed, 22 Feb 2012 15:37:05 Z

Nú er líkt til, at saltfiskaframleiðarar aftur kunnu lata fosfat í fisk, sum verður seldur á ES-marknaðinum.

Síðani november hava eisini føroyskir saltfiskaframleiðarar mist pening, tí ES hevur sett forboð fyri at nýta fosfat í framleiðsluni.

Fosfatið ávirkar eitt nú smakkin og litin á fiskinum, og hevur tí stóran týdning fyri prísin. Tá fiskurin verður útvatnaður, fer fosfatið úr honum aftur. Fosfat verður eisini nýtt i aðrari matvøruframleiðslu.

Saltfiskaframleiðarar hava lagt trýst á ES-nevndina um at aftur at loyva fosfati í saltfiski, og nú er líkt til, at tað fer at eydnast.

Matvørunevndin í fólkatinginum viðgjørdi málið í morgun, og millum teirra, sum mæltu til, at fosfat kemur á listan yvir loyvd evni, var Sjúrður Skaale, fólkatingsmaður. Ein samd nevnd tók undir við hesum.

Málið kemur fyri í matvørunevndini hja ES mánadagin. Verður undirtøkan nóg stór, kemur fosfat aftur á listan yvir loyvd evni 1. juni.

Ynskja somu rættindi

Wed, 22 Feb 2012 14:32:04 Z

Hvussu er at vera samkyndur og hvørji rættindi berjist felagsskapurin LGBT fyri. LGBT
er ein felagsskapur fyri samkynd, tívkynd og transpersónar. Í tí sambandi verður forkunnugt tiltak í Føroyahúsinum í Keypmannahavn tann 3. mars. Ólavur Eysturdal sigur, at endamálið við hesum tiltaki er at vísa á, at øll eru eins, hóast ymiskan seksualtitet, og tí verður eisini ynskt somu samfelagslig rættindir fyri øll.

Løgmaður veit einki um nýggju fiskirættindini

Wed, 22 Feb 2012 14:09:08 Z

Vinnan tekur væl ímóti uppskotinum, men Fiskimannafelagið ivast. Hoyr innslag í útvarpstíðindunum.

Nú fara sjúkrarøktarfrøðingarnir til samráðingar

Wed, 22 Feb 2012 13:27:06 Z

Meðan sjúkrarøktarfrøðingar væntandi byrja samráðingarnar við Fíggjarmálaráðið í næstu viku, bíða heilsurøktararnir við sínum sáttmálasamráðingum til seinni í vár, tá Almanna- og Heilsurøktarfelagið og Føroya Psykiatrifelag eru løgd saman.

Vár í Gong, forkvinna í Felagnum Føroyskir Sjúkrarøktarfrøðingar, sigur, at teirra krøv eru fest á pappír og klár at senda Lønardeildini í Fíggjarmálaráðnum; men hon vil ikki siga, hvat stendur á pappírinum.

Umframt lønarhækking hava sjúkrarøktarfrøðingarnir eins og hini almennu fakfeløgini nøkur serkrøv.

Differentiering í løn hóvar felagnum lítið, sigur Vár í Gong. Felagið Føroyskir Sjúkrarøktarfrøðingar umleið 1.000 limir.

Sáttmálin hjá heilsurøktarunum fór eisini úr gildi í oktober, men heilsurøktararnir vera neyvan teir fyrstu, ið standa í røðini at sleppa inn í fundarhølið hjá lønardeildini í Fíggjarmálaráðnum á Argjum.

Orsøkin er, at felagið, Almanna- og Heilsurøktarafelag Føroya, skal leggjast saman við Føroya Psykiatrifelag seinni í vár, upplýsir Majbritt Mohr, forkvinna í Almanna- og Heilsurøktarafelagnum.

Samanleggingin krevur millum annað ein eykaaðalfund og ein aðalfund, og tí verður neyvan farið undir samráðingar fyrr enn eftir 21. apríl, tá feløgini væntandi verða løgd saman.

Samanlagda Heilsurøktarafelagið hevur slakar 350 limir.

Mynd: Vár í Gong er forkvinna hjá sjúkrarøktarfrøðingunum.

FM vónin hjá Neistanum slóknað

Wed, 22 Feb 2012 12:10:07 Z

Nú eru sera lítil útlit fyri, at Neistin endurvinnur meistaraheitið í hondbólti hjá monnum, tí Neistin tapti móti STÍF á Skála í gjárkvøldið. Dysturin endaði 26-24.

Hetta var dysturin, sum annars var komin langt áleiðis sunnudagin, tá ljósið fór í høllini á Skála. Tá var seinni hálvleikur komin í helvt, og tá var STÍF á odda 18-14.

Nú eru VÍF og H71 best fyri at koma í finaluna móti KÍF.

KÍF hevur 30 stig eftir 16 dystir, VÍF hevur 20 stig eftir 17 dystir, og Neistin og H71 hava 16 stig, men Neistin hevur spælt tveir dystir fleiri enn H71.

Útflutningurin setti met í fjør

Wed, 22 Feb 2012 11:52:43 Z

Ongantíð áður hevur føroyski útflutningurin verið so stórur sum í fjør.

Vit útfluttu fyri útvið 5,4 milliardir krónur. Tað eru góðar 700 milliónir krónur meiri enn árið fyri, og vøksturin er 16 prosent í virði, sigur Hagstovan.

Hóast skipaútflutningurin fyllir nógv, er framvegis talan um metútflutning, tá skip ikki eru íroknað. Tá skip ikki verða tald við, varð útflutt fyri umleið 322 milliónir krónur meiri enn í 2010.

Hóast útflutningsvirðið er vaksið, er minni útflutt í nøgd. Fiskaútflutningurin er fýra prosent minni enn árið fyri. Hetta kemst av, at tað eru bara bólkarnir alifiskur og uppsjóvarfiskur, sum vaksa í nøgd. Allir hinir bólkarnir minka, serliga botnfiskurin og fiskaúrdráttir, sum t.d. fiskamjøl.

Størsta vøksturin í útflutningsvirði hevur uppsjóvarfiskurin. Í 2011 útfluttu vit fyri meira enn 1,1 milliard krónur, og tað eru góðar 400 milliónir krónur meiri enn árið fyri. Serliga er tað makrelurin, sum gevur henda stóra vøkstur, skrivar Hagstovan.

Alivinnan hevur útflutt munandi meiri av aldum fiski seinastu árini, og í fjør var vøksturin yvir 200 milliónir krónur samanborið við árið fyri. Í virði er vøksturin 15 prosen og í nøgd 29 prosent.

Útflutningurin av alifiski er nú oman fyri hálva aðru milliard krónur.

Meðan stórur vøkstur er í útflutningi av uppsjóvarfiski og alifiski, er afturgongd í serliga tveimum bólkum.

Útflutningurin av botnfiski er minkaður 200 milliónir krónur. Størsta afturgongdin er í upsanum. Í nøgd minkaði útflutningurin av botnfiski meiri enn 18.000 tons í fjør.

Í bólkinum “fiskaúrdráttir” er størsta minkingin í fiskamjøli. Orsøkin er vøksturin í alivinnuni, soleiðis at fóðrið, ið verður framleitt í Føroyum,verður brúkt í heimligu alivinnuni heldur enn at tað verður flutt av landinum.

Mynd: Tað eru serliga uppsjóvarfiskurin og aldi fiskurin, sum ger mun í útflutningstølunum fyri 2011.

Ætla at flúgva alt árið millum Vágar og Keypmannahavn

Wed, 22 Feb 2012 11:28:01 Z

Umboð fyri Vága Floghavn hava havt fund við norska lágprísfelagið Norwegian, sum hevur áhuga at flúgva upp á Føroyar. Enn er eingin avgerð tikin. Felagið fer at gera fleiri kanningar av umstøðunum í Vágum.

Sí innslag í Degi og Viku.

Fútin vil aftur leingja varðhaldsfongslingina

Wed, 22 Feb 2012 10:53:00 Z

Klokkan hálvgum tvey fer fútin aftur at biðja Føroya rætt leingja varðhaldið hjá 32 ára gamla manninum, sum er skuldsettur fyri at hava beint fyri Dánjali Peturi Hansen fyrst í november í fjør.

Maðurin varð varðhaldsfongslaður fyrstu ferð tann 16.november, og síðani er varðhaldið longt nakrar ferðir.

Fútin fer í dag at biðja rættin leingja varðhaldið fýra vikur afturat. Fútin fer eisini at biðja um, at rættarfundurin verður hildin fyri afturlatnum hurðum.

Skuldsetti maðurin verður mentalkannaður, og bíðað verður eftir úrslitinum av teirri kanningini. Eisini bíðar kriminalpolitiið eftir úrslitum av øðrum kanningum.

Bergleif Brimvík, kanningarleiðari, dugir ikki at siga, nær málið verður sent fútanum, sum ger av, um skuldsetti maðurin skal ákærast.

Verður maðurin ákærdur fyri manndráp, skal hann fyri nevningating.

Eingin annar er skuldsettur í málinum um tann horvna Dánjal Petur Hansen.

Leygarkvøldið klokkan sjey verður minningarløta fyri Dánjali Peturi Hansen á Gerðisvegi 34 í Saltangará, har Dánjal Petur búði.

Einki tímatal til fyrireikingartíð

Wed, 22 Feb 2012 10:28:11 Z

Kortini er Maud Wang Hansen, forkvinna í Pedagogfelagnum, væl nøgd við sáttmálan.

Hoyr innslag í útvarpstíðindunum.

Skulu eggja kvinnum at koppseta seg

Wed, 22 Feb 2012 10:01:29 Z

Ambassadørarnir, sum nú taka við, eru Rannvá Jónsdóttir Johannesen, Angjo Eidesgaard, Sára Eysturoy, Ása Winther Poulsen, Anja Johnsdóttir Thomsen, Gunn Vang Poulsen og Jóna Baldvinsdóttir

Sleppur ikki at ynskja børnum til lukku

Wed, 22 Feb 2012 09:53:36 Z

Eik banki sleppur ikki at ynskja børnum til lukku.

Tað hevur bankin fingið at vita frá Brúkaraumboðnum.

Eik banki sendi børnum bræv, tá tey fyltu 13 ár. Saman við brævinum var lýsingarblaðið "At vera tannáringur." Samstundis sendi bankin foreldrunum bræv um brævið, sum barn teirra fekk frá bankanum.

Men hetta er ikki eftir lógini um marknaðarføring, sigur Brúkaraumboðið.

Brúkaraumboðið sigur, at persónlig brøv kunnu ikki sendast børnum uttan samtykki frá foreldrunum. Og at senda børnum føðingardagsheilsanir er eisini marknaðarføring, “branding”, og slíkar heilsanir kunnu tí heldur ikki sendast børnum uttan samtykki frá foreldrunum.

Eik banki sendir nú foreldrunum brøvini til børnini, og so kunnu foreldrini avgera, um barnið fær brævið.

Brúkaraumboðið fer eisini at kunna hinar peningastovnarnar um marknaðarføring mótvegis børnum og ungum

Duga fólk at nýta hjartastartara

Wed, 22 Feb 2012 09:43:29 Z

Forkvinnan í Hjartafelagnum leggur dent á, hvussu umráðandi tað er at hava ein hjartastartara og ikki minni, at fólk duga at brúka startaran. Til hátíðarhaldið í Reyða Krossi Føroyadeild, har manningin á skipinum Eldborg, fekk handa ein kekk fyri 1. hjálparavrikið teir framdu, lótu teir kekkin til Hjartafelagið. Jensa Heinesen, forkvinna í felagnum sigur, at peningurin verður nýttur til at upplýsa um 1. hjálp og hvussu umráðandi tað kann verða við einum hjartastartara.

Fleiri bankar vilja sleppa av við Moody´s

Wed, 22 Feb 2012 09:37:23 Z

Fleiri danskir peningastovnar umhugsa nú at geva kredittmetingarfyritøkuni Moody´s durafjórðingin.

Jyllandsposturin veit frá fleiri keldum, at leiðslurnar í fleiri donskum bankum og realkredittstovnum óformliga tosa um, hvørt tey skulu sleppa samstarvinum við Moody´s, eftir at kredittmetingarfyritøkan hevur hótt við at lækka kredittmetingina hjá fleiri donskum peningastovnum.

Nykredit hevur ongar viðmerkingar til málið, men Spar Nord, Jyske Bank og Sydbank umhugsa sína framtíð saman við Moody´s.

- Tað er greitt, at tað, sum hevur hent, fær okkum at umhugsa, hvat vit yvirhøvur skulu brúka eina kredittmeting til. Tá vit hyggja at okkara viðurskiftum, eru vit á einum kredittmetingarstigi, sum vit ikki kunnu brúka serliga nógv. Um metingin fellur enn meira, hava vit enn minni brúk fyri henni, sigur samskiftisstjórin hjá Spar Nord, Ole Madsen, sambært Børsen.

Bank Nordik hevur júst avgjørt at siga upp samstarvið við Moody´s.

Janus Petersen, forstjóri, sigur, at bankin er so væl fyri fíggjarliga, at hann hevur ikki tørv á at taka lán. Tí tað er bara í sambandi við lántøku, at bankin hevur brúk fyri kredittmeting, sigur Janus Petersen.

Kommunur leggjast saman fyri kommunuvalið í heyst

Wed, 22 Feb 2012 09:15:01 Z

Spurningurin til veljaran á fólkaatkvøðuni um kommunusamanlegging verður ikki bara um veljarans egnu kommunu.

Fólk verða spurd, um tey taka undir við, at kommunurnar í teirra øki verða lagdar saman í eina kommunu. Økini eru sjey, sambært lógini um sjálvbodnar kommunusamanleggingar frá 2007.

Fólk í Fugloy til dømis, sum er í øki 1, verða spurd, um tey taka undir við, at Norðoyggjar verða skipaðar sum ein kommuna

Fólkaatkvøðan er ikki bindandi, men er bara vegleiðandi. Samanleggingarnar skulu verða framdar fyri kommunuvalið, sum verður 13.november í ár.

Kári P. Højgaard, landsstýrismaður í innlendismálum, sigur, at í fyrstu atløgu eru ongar ætlanir um at leggja kommunur saman við lóg.

Tá fólkaatkvøðan hevur verið, ætlar landsstýrismaðurin at bjóða kommunustýrunum í økjunum hvørt sær til fundar fyri at hoyra, hvat kommunurnar ætla.

Kommunurnar fingu uppskotið um kunngerðina um fólkaatkvøðuna til hoyringar í gjár, og hava freist at svara til 9.mars.

Landsstýrismaðurin hevur sagt, at fólkaatkvøðan verður 12.apríl. Hon er mett at kosta 1,3 mió. kr.

Verkfallið hjá pedagogunum er av

Wed, 22 Feb 2012 09:11:40 Z

Fyri løtu síðani varð nýggjur sáttmáli undirskrivaður millum Føroya Pedagogfelag, Kommunala Arbeiðsgevarafelagið og Fíggjarmálaráðið. Sostatt er eisini punktum sett fyri verkfallið hjá limunum í Føroya Pedagogfelagi.

Tá tað lýsir fyri degi í morginárini, kunnu túsundtals børn kring alt landið sostatt aftur byrja ein vanligan gerandisdag, í vøggustovum, barnagørðum og frítíðarskúlum, tá stovnarnir aftur lata dyrnar upp.

Í samrøðu við útvarpið segði forkvinnan í felagnum, Maud Wang Hansen, at felagið er fegið um nýggja sáttmálan. Forkvinnan útgreinaði tó ikki smálutirnar í nýggja sáttmálanum, sum varð undirskrivaður klokkan 21:45 í kvøld.

Nú skulu fiskirættindi galda í 12 ár í senn

Wed, 22 Feb 2012 08:46:36 Z

Landsstýrið ætlar at gera eina rullandi skipan fyri fiskirættindini, so skip altíð hava veiðuloyvi í 12 ár.

Landsstýrið mælir til í lógaruppskoti, at orðingin í lógini um vinnuligan fiskiskap um, at galdandi skipan varir til 1.januar 2018 verður broytt til "í 12 ár í senn".

Hetta merkir, at fiskirættindini verða galdandi í 12 ár, so leingi tey ikki eru uppsøgd, og uppsagnartíðin er 12 ár.

Tað merkir, at verandi veiðuloyvi, sum skuldu galda til 2018, sambært lógaruppskotinum verða galdandi til 2024.

Tá næsta fiskiár byrjar 1.september næsta ár, fáa skipini aftur loyvi í 12 ár, so veiðuloyvið tá verður galdandi til 2025. Tá fiskiárið 2014 byrjar, vera loyvini galdandi til 2026, og so framvegis.

- Lógarbroytingarnar, sum nú verða gjørdar, skulu leggja virkiskarmarnar hjá vinnuni og umsitingarkarmarnar hjá myndugleikunum í eina trygga legu, tí greiðari ræðisrættur verður knýttur at loyvunum. Og peningastovnarnir fara aftur at fíggja fiskiskip, nú óvissan um framtíðina hjá flotanum ikki verður so stór, skrivar táverandi landsstýrismaður Jákup Mikkelsen í uppskotinum, sum hevur verið til hoyringar hjá millum annað vinnuni.

Hoyringarfreistin var úti á middegi í gjár.

Lógaruppskotið er dagfest 14.februar, tað er dagin fyri, at Jákup Mikkelsen varð loystur úr starvinum sum landsstýrismaður.

Morgunlestur mikudagur 22.februar 2012

Wed, 22 Feb 2012 07:22:10 Z

Hoyr lesturin her

Soleiðis sær sáttmálin út

Tue, 21 Feb 2012 22:33:16 Z

Tvey ára sáttmálin, sum kemur í gildi við afturvirkandi megi frá oktober í fjør, sær í høvuðsheitum soleiðis út:

- lønarhækkan á 220 kr. um mánaðin

- lønardifferentieringin millum hægri og lægri lønir er minni enn í upprunasáttmálanum.

- Orðingin um fyrireikingartíð er útgreinað - tó uttan at tímatal er sett á.

Klokkan 21.45 endaði pedagogverkfallið, sum hevur vart í tríggjar vikur.

Í fundarhølunum í á fyrstu hædd í Fíggjarmálaráðnum skrivaði nevndin í Føroya Pedagogfelag undir ein 2 ára sáttmála við Lønardeildina á Fíggjarmálaráðnum og Kommunala Arbeiðsgevarafelagið.

Veðrið 21. feb.

Tue, 21 Feb 2012 18:49:16 Z

Hósea og Jónas

Tue, 21 Feb 2012 17:53:30 Z

Lurta eftir sendingini her.

1967

Tue, 21 Feb 2012 17:11:21 Z

Hesar og fleiri hendingar frá 1967 verða umrøddar í sendingini hesuferð, vælkryddað við tónleiki frá umrødda ári.

Serfrøðingur: Í lagi at sleppa sær av við kredittmeting

Tue, 21 Feb 2012 16:49:40 Z

Tað er í lagi, at BankNordik sleppur sær av við metingarfyritøkuna Moodys.

Tað heldur danski bankaserfrøðingurin, Bjarne Jensen.

Sambært forstjóranum í BankNordik hevur bankin sagt upp samstarvið við Moodys, tí brúk er ikki fyri metingunum.

- Vit hava ikki tørv á at læna pengar, og tíansheldur brúk fyri metingini hjá Moodys, sigur Janus Petersen.

Bjarne Jensen, bankaserfrøðingur, vísir á, at peningastovnar rinda dýrt fyri kredittmetingarnar frá Moodys, og tá BankNordik ikki hevur brúk fyri hesum metingum, er avgerðin løtt at taka.

Seinast lækkaði Moodys kredittmetingina hjá BankNordik og ávaraði samstundis um, at bankin nærkaðist einum stigi, har peningastovnar helst ikki vilja verða.

Janus Petersen vísir aftur, at bankin vrakar metingarfyritøkuna, tí bankin ikki fær eina kredittmeting, sum bankanum hóvar.

Átta stórir peningastovnar í ríkinum fingu í farnu viku eina fráboðan frá metingarfyritøkuni Moodys, at teir vóru á vandaleið, og at kredittmetingin helst fór at lækka.

Hesir bankar eru: Danske Bank, DLR Kredit, Jyske Bank, Nordea Danmark, Ringkjøbing Landbobank, Spar Nord Bank, Sydbank og Nykredit.

Metingarfyritøkurnar hava verið fyri atfinningum, tí ongar ávaringar vóru frammi undan seinastu bankakreppu.

Tí eru fleiri danskir serfrøðingar, sum halda, at lækkingin hesaferð hevur ikki so nógv upp á seg.

Biðja enn einaferð um undantaksloyvi

Tue, 21 Feb 2012 16:30:29 Z

Petra Johnsdóttir, stjóri í Nærverkinum, sigur, at støðan hjá summum búfólkum er hættislig. Hoyr samrøðu við Petru Johnsdóttir í útvarpstíðindunum.

Jørgen Niclasen: Royna at fáa semju

Tue, 21 Feb 2012 15:49:55 Z

- Vit royna at røkka eini semju. Tað hava vit gjørt fyrrapartin, og tað fara vit eisini at gera klokkan fýra.

Tað sigur Jørgen Niclasen, landsstýrismaður, sum fyrrapartin boðsendi øllum pørtum í sáttmálatrætuni millum arbeiðsgevarar og pedagogar til samráðingarborðið í Fíggjarmálaráðnum.

Steðgur er nú í samráðingunum, og partarnir kunna baklandið um fundin fyrrapartin. Avtalað er at hittast aftur í Fíggjarmálaráðnum klokkan 16.

Maud Wang Hansen, forkvinna í Pedagogfelagnum, sigur, at fundurin fyrrapartin var konstruktivur, sum hon tekur til, og partarnir umrøddu tey viðurskifti, sum áður hava verið frammi í samráðingunum.

Spurd, um nakað uppskot er lagt fram í samráðingunum, sigur Maud Wang Hansen, at hon hevur onga viðmerking, men at samráðingarnar verða tiknar uppaftur klokkan 16.

Í løtuni eru samráðingarnevndirnar ikki so fjølmentar, sum tær vanliga eru. Á fundinum fyrrapartinum vóru bert tvey umboð fyri hvønn partin.

Mynd: Jørgen Niclasen hitti fyrrapartin umboð fyri Javna og onnur, sum vóru komin í Fíggjarmálaráðið at vísa sína misnøgd við støðuna í sáttmálatrætuni.

Barnaverndirnar fáa størri øki at umsita

Tue, 21 Feb 2012 15:03:24 Z

Fráboðanarskyldan hjá myndugleikum og borgarum verður herd, tá nýggj barnaverndarlóg verður sett í gildi.

Tað ætlar Annika Olsen, landsstýriskvinna, sum arbeiðir við einum uppskoti um nýggja barnaverndarlóg. Málið hevur verið fyri í landsstýrinum, og er nú til hoyringar í samgonguflokkunum. Eftir hoyringina verður uppskotið lagt fyri tingið.

Sambært uppskotinum verða fakligu krøvini hjá starvsfólkum í barnaverndarumsitingini eisini herd.

Annika Olsen ætlar at skipa barnaverndarøkini í størri eindir.

- Barnaverndarmál eru sera viðkvom og trupul at umsita. Við størri eindum verður fakligi førleikin styrktur, eins og trygdin hjá tí einstaka verður munandi betri, sigur landsstýriskvinnan í almannamálum.

Aðalmálið í barnaverndarlógini er at verja barnið og at styrkja rættartrygdina hjá børnum og foreldrum.

Lasse Qvist er blivin Víkingur

Tue, 21 Feb 2012 14:45:47 Z

Eftir at Finnur Justinussen, sum bleiv toppskjútti í føroysku landskappingini í fjør, takkaði fyri seg og fór til Svøríki at spæla, hevur Víkingur leitað eftir nýggjum áleypara. Nú er hann funnin. Lasse Qvist hevur skrivað undir eitt ára sáttmála við Víking.

Lasse Qvist spældi fríggjakvøldið venjingardyst, sum Víkingur vann 5-0 á ÍF. Lasse Qvist skeyt tvey mál og legði upp til tvey onnur. Hetta hevur eftir øllum at døma sannført leiðsluna í Víkingi um, at hann er tann rætti leikarin til álopsplássið í felagnum.

Talan er helst um ein leikara, sum kann blíva ein av profilunum í føroysku kappingini. Lasse Qvist var, sum ungdómsspælari, knýttur at hollendska stórfelagnum, PSV Eindhoven, frá 2004 - 2005.

Í 2006 skrivaði hann sáttmála við FC Keypmannahavn. Hann spældi átta dystir fyri FCK og skeyt tvey mál.

Síðan 2009 hevur hann spælt fyri FC Nordvest, sum er í triðbestu donsku deildini. Har hevur hann spælt fimtan dystir og skotið tólv mál.

Lasse Qvist hevur spælt 42 ungdómslandsdystir fyri Danmark. Fimm fyri U16 landsliðið, tjúgu fyri U17 landsliðið, tveir fyri 18 landsliðið, sekstan fyri U19 landsliðið og ein fyri U21 landsliðið.

Heimasíðan hjá Víkingi skrivar, at Lasse Qvist er ein skjótur og sterkur áleypari, sum er væl fyri tekniskt.

Fyrsti dystur hjá Víkingi í landskappingini verður 25 mars. Tá spæla teir á útivølli móti TB.

Aldur tari kann gerast stór útflutningsvinna

Tue, 21 Feb 2012 14:35:48 Z

Tari kann liva av avlopsfóðri og øðrum frá laksaalingini. Í løtuni eru tríggjar taraverkætlanir í Føroyum: ein í Leirvík, ein í Funningsfirði, og sjálv arbeiðir Agnes Mols Mortensen saman við Fiskaaling um eina verkætlan. Hoyr innslag í útvarpstíðindunum.

40 listafólk fáa starvsløn úr Mentanargrunninum

Tue, 21 Feb 2012 14:08:05 Z

Mentanargrunnur Landsins hevur avgjørt at lata 40 listafólkum starvsløn til listaligt og mentanarligt arbeiði í ár.

Elin á Rógvi og Torbjørn Olsen fingu játtað hvør sína árs starvsløn.

Fimm listafólk fingu hálvt árs starvsløn. Tey eru Hanus G. Johansen, tónleikari, Høgni Mohr, rithøvundur, Archibald Black, listamaður, Hansina M. Iversen, listakvinna, og Poulina Jóanesardóttir, listakvinna.

33 listafólk hava fingið starvsløn í styttri tíðarskeið.

Í ár hevur Mentanargrunnur Landsins latið tilsamans 117 mánaðarlønir fyri góðar 2,8 milliónir krónur.

Okkurt árið hava listafólk fingið játtað starvsløn í trý ár; men av tí at umsóknirnar vóru so mangar, har søkt var um starvsløn í styttri tíðarskeið, var ikki rúm fyri at játta eina 3 ára starvsløn í ár, sigur nevndin.

Tilsamans vóru 138, ið søktu um starvsløn í ár.

225.000 krónur í íverksetarastudningi vórðu latnar trimum umsøkjarum.

Mynd: Elin á Rógvi hevur fingið starvsløn í eitt ár.

VÍF fekk uppreisn

Tue, 21 Feb 2012 13:44:01 Z

Kjakast um støðuna á almenna arbeiðsmarknaðinum

Tue, 21 Feb 2012 13:33:40 Z

Støðan á almenna arbeiðsmarknaðinum verður evnið í kjak-partinum í Degi og Viku í kvøld.

Í dag eru tríggjar vikur, síðani pedagogar og hjálparfólk fóru í verkfall. Nakrar samráðingarroyndir hava verið síðani, men einki er komið burturúr, og í dag sita partarnir aftur við samráðingarborðið.

Pedagogfelagið hevur hert verkfallið, og hevur tikið øll undantaksloyvi aftur. Hetta rakar serliga stovnarnar undir Nærverkinum, sum hevur sett eina neyðætlan í verk.

Við kjakborðið í sjónvarpsstovuni verða Sigrun Wardum, forkvinna í Javna, og Rósa Samuelsen, forkvinna í løgtingsins Trivnaðarnevnd.

Vertur í kjakinum er Beinta Løwe Jacobsen.

Mynd. Beinta Løwe Jacobsen er vertur í kjakinum í Degi og Viku.

Nærverkið setir neyðætlan í verk

Tue, 21 Feb 2012 13:09:58 Z

Um middagsleitið fekk Nærverkið at vita frá Føroya Pedagogfelag, at øll undantaksloyvi verða tikin aftur, og tí verður neyðætlanin, sum Nærverkið hevur arbeitt við, sett í verk.

Neyðætlanin ber í sær, at nøkur búfólk á sambýlum verða send til hús, onnur verða flutt á aðrar stovnar, og uppaftur onnur verða savnað í Leguhúsinum í Nesvík, upplýsir Petra Johnsdóttir Joensen, stjóri í Nærverkinum.

Umboð fyri Fíggjarmálaráðið, Kommunala Arbeiðsgevarafelagið og Pedagogfelagið fóru aftur til samráðingarborðið klokkan 10 fyrrapartin. Jørgen Niclasen, landsstýrismaður, boðaði pørtunum til fundar.

Fundurin varð niðurlagdur fyri løtu síðani.

Maud Wang Hansen, forkvinna í Pedagogfelagnum, sigur, at fundurin hevur verið konstruktivur, sum hon tekur til, og at partarnir hava aftur umrøtt viðurskiftini, sum áður hava verið til umrøðu í samráðingunum.

Maud Wang Hansen og Jógvan Philbrow, næstformaður, hava umboðað Pedagogfelagið í Fíggjarmálaráðnum fyrrapartin. Tey fara nú at kunna hinar nevndarlimirnar, og partarnir hava avtalað at hittast aftur klokkan 16.

SÍ áskoðararnir gjørdu sítt

Tue, 21 Feb 2012 12:38:53 Z

Væl mannaða SÍ kórið, bar sínar menn á lógvum og fram til sigurin móti Mjølni.

Magnus vendi dystinum

Tue, 21 Feb 2012 12:35:58 Z

Glaður steypavinnari

Tue, 21 Feb 2012 12:18:03 Z

Hetta heilaga Evangeliið skrivar

Tue, 21 Feb 2012 12:00:09 Z

Hoyr lesturin her

Floghavnin skal hava størri inntøkur

Tue, 21 Feb 2012 11:54:27 Z

35 ára gamli Jákup Sverri Kass er settur sum nýggjur forstjóri á flogvøllinum. Hann kemur úr einum starvi sum marknaðarstjóri í Atlantsflogi. Hoyr samrøðu við Jákup Sverra Kass í útvarpstíðindunum.

Annika markerar seg - politiskt og kvinnupolitiskt

Tue, 21 Feb 2012 11:43:58 Z

Sunnudagin gjørdi Annika Olsen, landsstýriskvinna, bart og skrivaði á facebook, at lønirnar hjá pedagogum við fýra ára útbúgving var niðurgerandi. Kjaktorgið í morgun viðgjørdi hesa útsøgnina og politisku støðuna um landsstýrismannaskiftið í síðstu viku.

Kappingin skal hava ein møguleika

Tue, 21 Feb 2012 11:24:56 Z

Johan Dahl, landsstýrismaður, hevur ongar ætlanir um at taka av ella lækka ferðaavgjaldið. Hann heldur, at kappingin í loftferðsluni, sum er á veg, skal fyrst fáa ein kjans.

Johan Dahl ásannar tó, at tað er ov dýrt at ferðast, og stendur tað til hansara, eigur prísurin fyri ein ferðaseðil aftur og fram á Danmarkarrutuni at kosta millum 1200 og 1800 krónur.

Sí innslag í Degi og Viku og samrøðu við Johan Dahl, landstýrismann, sum var gestur hjá katrini Petersen í sjónvarpsstovuni.

Hjartastartarin eigur at verða lógarkravdur

Tue, 21 Feb 2012 10:58:12 Z

Seinasta summar fekk ein av manningini á Eldborg ein hjartatilburð. Hinir bóru skjótt at, og hóast tað stóð um lív hjá Eyðuni Andreasen, varð hann bjargaður í øllum góðum.

- Høvdu vit ikki havt hjartastartara umborð, so hevði eg ikki staðið her í dag, sigur Eyðun Andreasen. Hann heldur, at hjartastartarin eigur at verða lógarkravdur.

Sí innslag í Degi og Viku.

Mynd: Eyðun Andreasen, sum fekk hjartatilburð umborð á Eldborg.

Fyrireika makrelfiskiskapin í summar

Tue, 21 Feb 2012 10:38:11 Z

Politiski makrelbólkurin, sum løgmaður setti fyri nøkrum vikum síðani, hevði sín fyrsta fund í gjár.

Bólkurin viðgjørdi, hvussu føroyski makrelfiskiskapurin í summar skal skipast, millum annað, hvussu kvotan skal býtast, um talan til dømis verður um eginkvotur ella felagskvotur.

Jacob Vestergaard, landsstýrismaður í fiskivinnumálum, sigur, at hann á fundinum í gjár fekk at vita frá flokkunum, hvat teir halda, og tað var ikki so stór ósemja á fundinum, sigur hann. Tilfeingisgjaldið var eisini umrøtt.

Jacob Vestergaard fer nú at fyrireika kunngerðir og møguligar lógir um makrelfiskiskapin í 2012, men áðrenn nakað verður sett í gildi, verða hinir samgonguflokkarnir hoyrdir, sigur hann.

Jacob Vestergaard sigur, at hann fyrsta dagin fer at áseta føroysku makrelkvotuna fyri 2012. Alt bendir á, at hon verður minst tað sama sum í fjør, 150.000 tons.

Í politiska makrelbólkinum eru Kaj Leo Holm Johannesen og Bárður Nielsen fyri Sambandsflokkin, Jacob Vestergaard og Jørgen Niclasen fyri Fólkaflokkin, Jenis av Rana fyri Miðflokkin og Kári P. Højgaard fyri Sjálvstýrisflokkin.

Guðstænasta í Glyvra kirkju

Tue, 21 Feb 2012 10:37:13 Z

Hoyr alla Guðstænastuna her.

Góð kensla at verða viðurkendur

Tue, 21 Feb 2012 10:29:41 Z

Heimasíðan northernbrass.dk velur á hvørjum ári ársins dirigent, ársins hornorkestur og fleiri aðrar flokkar. Havnamaðurin, Andras Olsen, var innstillaður sum ársins dirigentur 2011 og vann henda heiður. Heimasíðan skrivar soleiðis: >Årets dirigent: Andres Olsen, Lyngby Taarbæk Brass Band. Allerede sidste år blev vi opfordret til at sætte Andres Olsen på denne liste. Og i år kan vi ikke undgå ham! Sidste år lavede han forarbejdet til Russell Gray og i år til Selmer Simonsen ? begge med en DM titel efterfølgende! Ved Silkeblæs 2011 dirigerede han selv Concord hele vejen til en flot 2.plads>

Fara nú aftur til samráðingarborðið

Tue, 21 Feb 2012 10:14:59 Z

Arbeiðsgevararnir og Pedagogfelagið fara nú aftur til samráðingarborðið

Jørgen Niclasen, landsstýrismaður við fíggjarmálum, váttar fyri útvarpinum, at hann hevur boðað til fundar klokkan 10.

- Vit hava gjørt tvær royndir í farnu viku, og nú gera vit eina afturat. Hesaferð møtast vit í einum minni forum, og mín vón er, at vit finna fram til eina loysn á málinum, sigur Jørgen Nicalsen, landsstýrismaður.

Spurdur, hvussu nógva tíð hann hevur sett av til fundin, sigur Jørgen Niclasen, at hann setir ta tíð av, ið skal til fyri at finna fram til eina semju.

Hesaferð verða bert seks fólk við á fundinum, sum verður hildin í Fíggjarmálaráðnum, tvey fyri hvønn av pørtunum.

Fyri Fígggjarmálaráðið møta Jørgen Niclasen og Snorri Fjalsbak, stjóri á Lønardeildini. Fyri Kommunala Arbeiðsgevarafelagið møta Heðin Mortensen formaður og Anita Fuglø, skrivstovuleiðari.

Fyri Pedagogfelagið møta forkvinnan, Maud Wang Hansen, og næstformaðurin, Jógvan Philbrow, skilir útvarpið.

Løgmaður við útvarpið, at hann vónar, at ein loysn fæst á trætuni nú, so at sleppast kann undan, at undantaksloyvini á serstovnunum verða tikin aftur.

Stoltenberg til Føroya

Tue, 21 Feb 2012 10:03:51 Z

Løgmaður hevur boðið norska forsætisráðharranum, Jens Stoltenberg, til Føroya á almenna vitjan, og vitjanin verður í mai, upplýsir Løgmansskrivstovan.

Endamálið við vitjanini er at styrkja vinarbondini og samstarvið millum Føroyar og Noreg.

Kaj Leo Holm Johannesen, løgmaður, sigur um vitjanina:

"Jens Stoltenberg hevur leingi ynskt at vitja Føroyar. Føroyar og Noreg hava tøtt søgulig og mentanarlig bond og mong felags áhugamál eitt nú viðvíkjandi fiskivinnu og ES. Vitjanin er eitt gott høvi at umrøða hesi evni og styrkja samstarvið landanna millum."

Skráin fyri vitjanina verða kunngjørd seinni.