Skrásett parlag ella hjúnalag millum samkynd verður ikki samtykt undir hesari samgonguni.
Tað ger Kaj Leo Holm Johannesen, løgmaður og samgonguleiðari, greitt.
Formaðurin í Miðflokkinum, Jenis av Rana, segði við útvarpið fríggjadagin, at samgongan er samd um leistin í hesum málinum.
Hóast eitt slíkt uppskot neyvan kemur frá samgonguni, gloppar løgmaður, sum eisini er formaður í Sambandsflokkinum, dyrnar fyri sínum partamonnum í spurninginum um tey etisku málini. Teir gera sjálvir av, hvussu teir atkvøða, sigur hann.
Stendur á jøvnum
Formenninir í hinum báðum samgonguflokkunum, Jørgen Niclasen úr Fólkaflokkinum og Kári P. Højgaard ur Sjálvstýrisflokkinum, hava sagt, at tað stendur til hvønn einstakan tinglim, hvussu hann atkvøður í hesum málinum.
Tað stendur mest sum á jøvnum í løgtinginum, tá talt verður upp, hvussu nógv taka undir við samkyndum hjúnaløgum. 16 tinglimir eru fyri, 15 eru ímóti, og tveir vilja ikki siga, hvørja støðu teir hava.
Framsókn, sum er í andstøðu, hevur boðað frá, at flokkurin í hesari tingsetuni ætlar at leggja uppskot fyri løgtingið, ið skal tryggjað samkyndum rættin at ganga saman í skrásett parlag.
Meiri verður at frætta í útvarpstíðindunum.
