Fyri fyrstu ferð verður fundur um makrelin á hægsta politiska stigi, nú fiskimálaráðharrarnir í londunum við Norðuratlantshav hava sín árliga fund.
Maria Damanaki, nevndarlimur í fiskiivinnumálum í ES, norski fiskimálaráðharrin, Lisbeth Berg-Hansen, og Jacob Vestergaard, landsstýrismaður, eru øll í Reykjavík, og har er sjálvandi eisini íslendski fiskimálaráðharrin, Steingrímur J. Sigfússon.
Hittast í dag
Jacob Vestergaard sigur, at væntandi hittast tey fýra seinnapartin í dag og aftur í morgin, so hvørt sum skráin fyri ráðharrafundin loyvir tí.
Makrelurin er annars ikki á skránni fyri fiskiráðharrafundin, men nú, tey øll eru í Reykjavík kortini, fara tey at tosa um makrel. Embætisfólkini, sum plaga at samráðast um makrel fyri Føroyar, eru við í Reykjavík.
Talan er um at royna at rudda politiska slóð fyri samráðingunum um makrel, sum vera í heyst millum strandarlondini.
